Llingua minoritaria y biblioteques públiques

El marcu européu nel qu’Asturies ta inxertada empobina a la nuesa llingua propia a la oficialidá. Nun fai falta remembrar tolos testos que sofiten esta posición. Pero vamos fixanos nun campu concretu de l’aición cultural de güei: les biblioteques públiques en rellación al asturianu.

El manifiestu de la IFLA/UNESCO sobre la Biblioteca Pública de 1994 afita que “los servicios de la biblioteca se desendolquen sobre la basa d’igualdá d’accesu pa toles persones, ensin tener en cuenta la so edá, raza, sexu, relixón, nacionalidá, idioma o condición social”. Y continúa, “deben ufiertase servicios y materiales especiales p’aquellos usuarios que por una u otra sida nun puean facer usu de los materiales y servicios ordinarios, por exemplu, minoríes llingüístiques (…)”.

Y ente les misiones qu’encamienta a la biblioteca pública, afita:

7. fomentar el diálogu intercultural y favorecer la diversidá cultural;

8. da-y sofitu a la tradición oral;

9. garantizar a los ciudadanos l’accesu a toa triba d’información de la comunidá;

12. da-y sofitu y participar en programes y actividaes d’alfabetización pa tolos grupos d’edá, y de ser preciso, entamalos.

La lliteratura infantil y xuvenil n'asturianu llegó a la maurez

García Oliva considera que la lliteratura infantil y xuvenil n'asturianu llegó a la so etapa de maurez y espoxigue
UVIÉU, 04 de Payares (EUROPA PRESS)
L'escritor y académicu de la llingua Vicente García Oliva consideró güei que la lliteratura infantil y xuvenil n'asturianu ta nesti momentu na so etapa d'espoxigue y madurez, cola apaición de temes diversos diferentes de los yá tradicionales, como yeren los didáuticos o mitolóxicos.
Foi la conclusión principal de la so intervención güei nes Xornaes d'Estudiu de la Llingua Asturiana, qu'organiza l'Academia de la Llingua na Facultá de Filoloxía de la Universidá d'Uviéu.
García Oliva dio dellos apuntes que debe valir como base pa ellaborar una hestoria de la lliteratura infantil y xuvenil, considerando qu'había que tomar como puntu de partida 'Montesín' de María Xosefa Canellada, "con dalgún referente anterior, pero sin importancia". Sí matizó que se debería dedicar un capítulu previu a la lliteratura oral y escrita. "Los cuentos populares yá vienen de munchu tiempu, y los neños participen del disfrute d'ellos y de les alvertencies que trayíen".
Dempués consideró qu'hai cuatro etapes cronolóxiques. La primera refierse al didautismu, al ser na so mayoría llibros didácticos, dirixíos al deprendimientu. Una segunda etapa sedría'l traduccionismu, onde predominaríen les traducciones, non sólo de castellán, sinón d'otres llingües. La tercer etapa sería'l mitoloxismu, porque cola apaición de nuevos autores, "munchos sacaben llibros de seres mitolóxicos faciendo coses de les más diverses, como dir al espaciu o pegase".
A lo último, taría la etapa actual, "la del espoxigue, o maurez" d'esta lliteratura. "Los temes yá son abiertos: temes importantes como l'ecoloxismu, la guerra civil, violencia, el terror", comentó. Como exemplos d'esti últimu pasu, mentó llibros como 'El nome de Roselina' de Carmen Ojeda, o 'Elemental querida Lisa', del propiu García Oliva, sobre la guerra civil. También señaló otres obres, como 'Caos' de Dolfu Camilo, o 'La neña de les trences al revés' d'Iris Díaz Trancho, que trata les diferencies ente cultures y países.

La Biblioteca d'Asturies

Prestóme asgaya l'amable esposición de Santiago Caravia y l'amuesa de xoyes bibliográfiques de la Biblioteca d'Asturies, que ye téunicamente la nuesa Biblioteca nacional, cosa que muncha xente desconoz. De la Seición Asturiana comentóme como datu interesante que na actualidá hai más de 300 escritores en llingua asturiana, que pa ser una llingua minoritaria que tovía nun ye oficial, ta mui bien.

Llibros de la coleición escolín

Pa entamar a deprender asturianu, equí va la llista de los 5 caberos llibros de la coleición que l'Academia de la Llingua Asturiana dedica a la lliteratura infantil, curiada nos testos n'asturianu y nes illustraciones y a bon preciu:

60. Tapín de Picupáu
PABLO RODRÍGUEZ MEDINA.2006. P.V.P.: 4,15 €


61. Saurín y Saurón, dinosaurios del copón(Versión n'asturianu d'Iyán González)
CELIA MARCOS PASCUAL.2006. P.V.P.: 4,15 €

62. La Guaxa
MIGUEL SOLÍS SANTOS.2006. P.V.P.: 4,15 €

63. Benxamín, el perrucuspín
ALBERTO MENÉNDEZ GARCÍA.2007. P.V.P.: 4,15 €

64. Toya yá ye grande
XULIO BERROS.2009. P.V.P.: 4,15 €